AlexisP13.txt

#META#  TextURI         :: AlexisP13
#META#  DEAF            :: http://www.deaf-page.de/fr/bibl/bib99a.php#AlexisP
#META#  TL              :: Alex., Alex. S.
#META#  FEW        		
#META#  ARLIMA          :: https://www.arlima.net/no/114
#META#  Author          
#META#  AuthorBorn
#META#	AuthorBornAmb
#META#  AuthorDied
#META#	AuthorDiedAmb
#META#	AuthorFl1
#META#	AuthorFl2
#META#  TextTitle       :: La vie de saint Alexis
#META#  TextSubtitle	  :: poème du XIe siècle et renouvellements des XIIe, XIIIe et XIVe siècles publiés avec préface, variantes, notes et glossaire
#META#  TextVols        :: 1
#META#  TextSubj        :: hagiography
#META#	TextDom
#META#	Translation
#META#	Collection
#META#	CollectionNo
#META#  TextDescARL     :: 123 laisses de vers décasyllabiques monorimes (1278 vers)
#META#  TextDescVers    :: 10
#META#  TextDateARL     :: XIIIe siècle
#META#  TextDateAdj     :: 13
#META#	TextDateMin
#META#	TextDateMax
#META#  EdEditor        :: Paris, Gaston; Pannier, Léopold
#META#  EdPlace         :: Paris
#META#  EdPublisher     :: F. Vieweg
#META#  EdVol           
#META#  EdYear          :: 1887
#META#  EdPages         :: 279-317
#META#  MsBase          :: Ma, Carlisle Cathedral
#META#  MsOther         
#META#  MsNum           :: 2
#META#	MsDateARL
#META#	MsDateAdj
#META#	Form
#META#	Complete
#META#	NoWords
#META#	NoLines
#META#	DialAuth
#META#	DialScribe
#META#  ScanURL         :: https://archive.org/details/laviedesaintale03alexgoog
#META#  ScanURIOther	
#META#  ArkID           :: ark:/13960/t1jh3nt8t
#META#  LccnID          :: 14022514
#META#  OclcID          :: 67605175
#META#  WebAuthor       :: David Joseph Wrisley
#META#  ORCIDWebAuthor  :: orcid.org/0000-0002-0355-1487
#META#  WebReviewer       
#META#  ORCIDReviewer   
#META#  MiscInfo        :: the thirteenth century version in this volume
#META#  CCLicense       :: CC BY-NC-SA 4.0 International


*** START
§LI VIE SAINT ALESIN ET COMMENT IL MORUT.
PageV01P279
# |
Cha en arriére, an tens anchienors,
Fois fut en tiere et justiche et amors
Et verités et creanche et donchors;
Mais ore est frailes et plains de grans dolors.
Jamais n’iert teus con fut as anchissors.
Ne portent foit li marit lor oissors,
Ne li vassal flanche lor signors......
# |
Au tens Noé et an tens Moysant,
An tens David cui Dius par ama tant,
Bons fut li siécles, n’arons mais si vaillant.
Vieus est et frailes, tot s’en va defalant:
Ne portent foit as péres li enfant,
Et li filleul vont lor parins boisant,
Li justichier le loi Din malmenant,
Et li signor lor molliers ahontant.
Goie et leeche va tote defalant:
Soz chiel n’est hom ki de l’avoir ait tant
PageV01P280
Ne se redote dou tens a en avant.
Pries est li fins par le mien eschiant.
En l’honor Diu le glorios poissant,
Ki nos crea trestos a son semblant,
Vous vuel conter un exemple mout grant
D’un saintisme home et d’un sien cier enfant.
# |
Li Diu vassaus ot non Eufemiens:
Cuens fut de Rome et mout bons crestiens,
Et sages hom des autors anchiens;
Tos tens mena grans tenchons sor paiens,
Et sainte eglise ama sor totes riens;
De felonie n'ot onkes en lui riens;
Et prist mollier puis k’il fut anchiens....
# |
Puis conviersérent ensemble longhement;
Assés i orent et or mier et argent
Et vair et gris et viés vin et forment
Et bors et viles et rice tenement,.......
Et sainte eglise revisdérent sovent.
Mais d’une rien lor poise mout forment,
K’il n’ont enfant; si en sont mout dolent,
Diu en apielent andoi parfitement."
"He rois de glore, par ton comandement
Un fil nos done ki soit a ton talent."
# |
Tant li deproient par grant humilitet,
Et en lor cuer en ont tant sospiret,
Et en lor ieus tantes larmes ploret,
Et ont as povres tant viestement donet,
Ke nostre sire par le siue bontet
A le mollier tramist feconditet:
Un fil lor done, si l’en sévent bon gret.
De saint batesme l’ont tost regeneret,
Biel non li donent en le crestientet:
Dant Alexis ont le fil apielet.
PageV01P281
# |
Li gentius kom cui Dius le vaut doner,
Apries li dame ki tant fist a loer,
Soingnosement fisent l’enfant warder
Et tenrement et coucier et lever:
Mout devint biaus, si fist mout a amer,
Puis si le fisent a l'escole mener,
Et l’escriture enseignier et mostrer.
En poi de tens sot bien lire et canter,
Et en latin mout sagement parler,
Et une loi gentement visiter.
# |
Et kant li enfes fut des ars bien senés,
De mout ciers dras s’est ricement parés:
Droit a le cort le roi en est alés;
Tant le siervit par ses humilités
Ke li a armes et warnemens donés,
Et les honors dont ses pére iert casés
Li a rendues, et des autres assés.
# |
Kant voit li pére ke mais n’ara enfant
Fors ke chel sol ke il par aime tant,
Dont se porpense del siécle a en avant:
Or veut ke prenge mollier en sen vivant.
Il en a quise une mout avenant,
Fille a un duc, un rice home vaillant.
Chius li otroie, et mil livres vaillant
Et un castiel asasel et manant.
# |
Noment lor tierme de lor assemblement:
Kant vint au faire sel font mout liement
Mout en sont liet d’ambes pars li parent.
Dans Alexis l’esposa voirement,
Mais de chel plait ne vausist il nient:
De tot en tot a Diu a sen talent;
Se li loisist il viesquist castement,
Ke de chel siécle ne quist encombrement.
# |
Kant li siens pére ot fait tot apriester
PageV01P282
Et ses barons venir et auner
Et sen palais ricement conreer
Et fait des noches le premerain soper,
Li jors s’en va, si prent a l'aviesprer:
Traient les napes, les tables font oster
Et lor relief coillir et amasser
Et a frarins departir et doner.
# |
Chou dist li pére: "Biaus fils, va t’ent coucier
Avuec t’espose: Dius te doinst hiretier!"
Ne vaut li enfes sen pére corechier:
Sus se drecha, ne l’osa delaiier;
Vint en le cambre, si se fait descauchier.
Li pére i fut et li mére au vis fier;
Le cambre font enchenser et joincier,
Et kant s’en issent si l’ont faite vuidier.
Et Alexis rewarda se mollier.
# |
Kant Alexis ot se femme veue,
Ki tant par est cortoise et bien creue
Et covoitose et blance en se car nue,
Et voit le cambre ki si est portendue,
Dont li ramenmbre de se cheleste drue,
De sainte eglise ke tant a maintenue;
S'il chele amie ki dou chiel est venue
Por carnel femme relenquist.....
Dont crient il mout ke s’arme soit perdue
Et au juise Damediu confondue.
# |
"He Dius," dist il, "ki nos as a sauver,
Et en le virgene te laissas aombrer
Et en le crois te laissas delivrer
Por nos caitis peceors racater,
Fai nos, ciers sire, tes commans eswarder,
Ke ja diables de nos ne puist gaber.
Dont me cuida bien mes pére aloer
Kant il me fist cheste dame esposer?
PageV01P283
S’or ne m’en fui tot me veut afoler
Et en infier el plus parfont jeter."
Dans Alexis sospire mout forment
Et si reclaime Diu mout parfitement,
Se france espose castoie douchement.
Sainte Escriture li despont saintement,
Et il li blasme cheste vie forment
Et l'autre voie de glore li aprent:
Tant veut parler od li tot bielement
Ke couciet soient par tot le pavement;
Puis s'en fuira s’il puet cheleement.
#  |
Tant le castoie ke li nuis est moie
Et li waite est endormie et coucie
Et li puchiele mout forment anuiie;
Puis prent l’aniel dont il tot enwagie.
Deus pars en fist par merveille boidie,
S’en a le dame l’une moitiet baillie
Et puis a l’autre sor lui bien estoiie:
S’il jamais a Rome tant aprocie
Ke il resoit en le sale proisie,
Et il lor mostre chele seigne asaisie,
Ke l' reconoisse se femme l'escavie.
# |
Dist li puchiele: "Or sui mout eswarée;
La m’en reporte dont tu m’as aportée.
Ke quierras ore en estraigne contrée?
Por coi me lais kant tu m’as esposée?
Demain serai de te cambre jetée,
Puis m’en irai comme femme eswarée;
Tel honte arai jamais n’ierc honorée."
"Biele," dist il, "tu n’ies mie senée:
Cheste grant goie t'ara corte durée,
A Diu te tien, si devien s’esposée:
T’arme iert el chiel de goie coronée;
Avuec les angeles iert assise el posée.
PageV01P284
"Gentius puchiele, chestui prent a signor
Ki en le crois soffrit mort por t'amor,
Por nos jeter de chele grant puor
Ki fait les armes en infier grant dolor.
N’a en chest siécle nule parfite amor,
Mais tot i somes en peine et en dolor;
Par mout grant goie s’assemblent peceor,
Mais il departent a duel et a tristor.
# |
"France puchiele, or te tien en bontet,
Si tien net cuer et...................
......cors ki tant sont bien molet
Mar virent onkes le lor grande biautet,
Se por icheste dolente vanitet
Sont en infier el plus parfont jetet.
Me biele amie, warde te casteet;
Il te sera mout bien werredonet,
K’ensemble as angeles prendras sochietet.
S’en porteras corone de clartet.
# |
"Me biele drue, or me done congiet,
Jou ai viers Diu mon coraige ficiet;
Si werpirai et me tiere et men fiet,
Et tot le liu ou chis grans palais siet
Ke Diu ne pierge et le soie amistiet.
Mes pére fait de moi mout grant peciet,
Ki m’a dou siécle emboet et loiiet:
Por un seul poi k’il ne m’a engigniet
Et en infier ou plus parfont lanchiet.
Dius te soit warde par le soie pitiet,
Car jou m’en fui en escil a men piet."
# |
Kant li puchiele oit de sen signor,
Ke veut werpir li et tote s’honor,
Savoir poés k’ele ot au cuer dolor:
Tel crit jeta k'ele ne pout grignor;
PageV01P285
Dont a li sire mervillose paor.
"Mierchit," dist il, "biele, por Diu amor!
Ne faire honte Jesu ton creator.
Se tu me dones de lui siervir loisor,
En paradis en le glore angelor,
As de conquierre corone a oriflor.
# |
"France puchiele," chou dist sains Alexis,
"Se jou hui fuisse en un tornoi ochis,
Ancui seroie apielés et malrnis
Et en le tiere acovetés et mis;
Puis si m’aroies en es les quinze dis
Si obliet ke ainc ne fuisse vis:
Tot autretel, s’or te prendoit te fins,
Feroie jou de toi, jou l’te plevis.
Dolens tos chiaus ki por lor ors delis
Pierdent le longhe goie de paradis!
# |
"France puchiele, n’oblie t’arme mie.
Car li hon fait mout grande dierverie
Ki por le car se lasse d’arme oblie;
Car li fiel cors l’a forment enhaie:
Ja entre iaus deus ne faura aatie,
Car li cors aime putaige et glotrenie
Et vanitet et pereche et folie,
Si veut avoir tos tens le panche emplie;
Lui ne caut onkes soit maus ou felonie.
# |
"Tantost con l’arme ist de chel cors puant,
Ki n'ama onkes ne Diu ne sen comant,
Mais de mal faire se fist fort et poissant,
Si vinrent lues mil diable acorant
Ki l’encauchiérent trestot vers le torment
Ou li vier sont et li sierpent mordant.
Coi k’il en fachent, chou trovons nos lisant,
PageV01P286
Au samedi anchois le coc cantant
Revient droit l'arme a le fosse criant,
Le puant cors mout forment maudisant
Ki l’a conduite en chel tonnent si grant.
# |
"He cors, dist l’arme, mar te vi onkes net;
Mau soit de l’hore ke fumes ajostet,
Et maudit soient de sainte trinitet
Andoi li piet ki chou ont poralet,
Et les deus mains ki ont chou manovret,
Et ichil cuers ki chou a porpenset,
Aussi li boce ki chou a porparlet,
Et li doi uel ki chou ont rewardet
Et les oreilles ki chou ont escoutet
Dont li mien membre sont si grief tormentet!
# |
"Or giras, cors, en le tiere eniermee,
Et jou irai come maleuree
A le dolor ke tu m’as porparlee
Dusk'au juise. . . ............
Kant te cars ert de mort resuschitee,
El en l'aet de trente ans restoree,
Dont serai, cors, droit a toi ramenee
Et en ches membres droit a toi restoree,
Od toi ensemble en le flame embrasee
Ke li diable nos aront aprestee;
Puis comparras l’orgueil et le posnee
Ke tu tos jors as si grant demenee.
# |
"France puchiele, pense de Diu servir:
Donte te car cui estovra porir.....
Cui estovra et bien et mal sentir
De li te peine ke le puisses warir.
Chele a grant goie ki puet a Diu venir;
Lasse cheli cui covient departir
PageV01P287
Et en infier od les maufés gésir
Et en le flame tos tens adies bruir!
# |
"Gentius puchiele, con fors plais la sera,
Kant nostre sire au jughement venra.
Et il se crois lés nos establira
Et il ses plaies totes nos mosterra
Et le corone d’espine k’il porta !
Or me di, biele, ke li mauvais fera
Kant li plus justes a chel jor tremblera.
Goios chelui ki desiervit ara,
Ki a chele bore a diestre part sera
Et od les angeles en paradis ira !
# |
"La n’ara ja parlet de ricetet
Ne de paraige ne de nobilitet
Ne de grant cors ne de legier costet
Ne de caucier ne d’ermin engolet:
Chent mile marc de deniers moneet
N’i valent mie un boujon empenet,
S’il en chest siécle ne sont por Diu donet;
Ne rois ne cuens n’i menra poestet,
Mais chil seront le jor tot coronet
Et trait avant et signor apielet
Ki chi aront vescut en casteet
Et maintenue droiture et caritet
Et viers lor proismes par bone foit erret,
Ckil troveront le postic aornet
Et le portier de l’ovrir apriestet,
Et tot li autre iérent en sus botet
Et as diables en lor mains delivret.
# |
"France puchiele, or me laissiés fuir:
Si vos irai conquierre et desiervir
Chele grant glore ki ne puet definir,
Ou caus ne frois ne nos pora suir
PageV01P288
Ne fains ne sois ne nule riens nuisir;
La te ferai de tel conroit viestir
Ke nus eaiges ne pora enviesir
Ne lére enmbler ne robére tolir.
Chil ki la sont ont si tot lor plaisir
Nus hom ki soit ne lor puet rien tolir.
# |
"Gentius puchiele, car me laissiés aler:
Si vos irai conquierre et aeater
Chele grant goie ki ne puet tresaler;
Sos chiel n’esl boce ki le sace conter
Ne nus euers d’home ki sace porpenser
Con faite goie Dius a fait apriester
En paradis por ses amis fiever;
Ainc uel de car ne l' porent eswarder
Ne esprit d’home ne le porent trover.
Goios chelui ki l’ pora porpenser
Et en chel siécle téle vie mener
Ke s’arme puist par chele porte entrer,
Et od les angeles par dedens convierser!"
Ot le li biele, si laissa le plorer.
# |
"France puchiele, por l'amor Diu, mierchit!
Lai m’ent aler, car tuit sont endormit."
"Va t’ent a Diu," li biele respondit:
"Chius ert dolens ki toi engenuit,
Si iert li mére ki soef te norit
Et jou meisme ki t’avoie a marit;
Or verrai plait a grant duel departir.
Or t’en va, sire, kant ne te puis tenir.
# |
"S’en ten conseil le pooie trover
K’ensemble od toi m’en laissasses aler,
PageV01P289
Ja me verroies gentement apriester,
Tondre mes crins et wimples afubler,
Et prendre eskerpe et bordon acater:
Toi siervirai de tes dras relaver,
En si ke ja ne te quier adeser
Ne carnelment dalés toi convierser."
"Non ferai, biele, Jesus te puist sauver!
# |
"Ains te comant a le virgene Marie,
Ke des diables te port tel warandie
Ke mais ne puisses iestre par iaus honie."
A tant s’en tome, se voie a acueillie;
Ne trueve sierf ki pas li contredie,
Car Darnedius li siens pére l’en wie...
De le puchiele ke il a conviertie
Ke il li done poestet et baillie
De Diu siervir tant ke s’arme iert warie.
De toi chel plait ne set ses pére mie,
Non fait se mére ki estoit tote fie
K’il en se cambre dormist dalés s’amie.
Kant le saront ke il l’a relenkie,
Si durement en iert Rome estormie
K'ainc mais ne fut plus grans dolors oie.
# |
Sains Alexis vint a le mer fuiant;
lluekes trueve une barge flotant
Ki de passer se vait aparillant:
Done son pris, si entra ens corant.
Drechent lor voiles chil maistre maronant;
Parmi le mer s’en eskipent a tant;
Droit a Laliche cuident venir siglant,
Mais Diu ne plot ne le sien cier cornant:
Uns vens leva sor diestre costiant
Ki les empeint trois liues bien avant,
Si k’il aprocent de Jerusalem tant
Ke de chel port ou il viénent nagant
PageV01P290
I vait on bien, che trovon nos lisant.
En un sol jor a un mulet ambiant:
Savoir poés k’ ensi plot Diu le grant.
# |
Es vos au port saint Alexis venut
Et de le barge fors a le tiere issut,
Vint au sepulcre ou nostre sire fut:
Fait ses proiiéres, si s’a confies rendut;
Un jor entier et dos nuis i estut
Ke ne manga de se boce ne but,
Tant s’en delite ke nostre sire i fut;
Et au tierc jor viers le flun Jordain mut,
Si a baigniet sen digne cors tot nut;
Puis prent les paumes et un espic solut;
Droit a Laliche vient le camin batut,
Mais jou ne sai con longhes i estut;
Ou k’il ala Diu siervit et conut,
Et nostre sire l’en prieste grant viertut.
Et si ie warde ensi con le sien drut.
# |
Et kant li sire d’iluec se retorna,
Droit en Alis le chitet s’en ala
Por une imagene k’on iluec li prisa,
Ke li sains angeles de ses mains figura
Ki a le virgene le messaige anoncha:
Kant nostre sire en sen cors s’aombra:
Avuec ichou k’il en li eswarda
Fist si l'imagene ke bien le resembla,
Et Marien apries si l’apiela,
Et en Alis le chitet l’emporta
En ichel jor ke Dius resuschita
De chel sepulcre ou Josés le posa.
La le requiert chis hon ki Diu ama.
Tantost con il ens el mostier entra
Ou il l’imagene nostre dame trova,
De devant li s’estendit et posa:
De ses peciés douchement li proia
Et de l espose k’il werpit et laissa.
PageV01P291
Puis prist l'avoir ke de Rome gieta.
A povres gens le rendit et dona,
K’onkes maaile sor lui ne resierva.
# |
Kant li sire ot departit sen avoir,
Entre les povres s’en vait el renc seoir.
Rechut l'aumosne kant il le pot avoir,
Si en entra a Diu de tel savoir
K’onc ne retint sen disner mie au soir,
Ne dou soper n’ i vout tant rechevoir
Dont el demain puist un repast avoir.
Tant a junet ke tot le vis a noir.
Ne fait se car gaires de sen voloir;
A Diu siervir met grant peine por voir,
Et nostre sire li priesta tel pooir
K’onkes diables ne l’ pot faire encaoir.
# |
Or revenrai a chiaus de le contrée,
Ki tel dolor ont por lui demenée.
Li dame crie con fame forsenée:
"Fius Alexis, kel tristor m’as donée!
Fius, tu t’en vais, s'as laissiet t'esposée
Ke jou t’avoie si cortoise donée:
Tel duel me fais ke ja serai diervée."
Cuert en le cambre, tote l'a deskirée,
Oste ses pailes et se cortine lée:
Ja mais par home nen iert reconfortée;
A ichest duel ariére ciet pasmée,
Ne mais li sire l’en a sus relevée.
# |
Li damoisiele regreta mout sen drut,
Et li mére a sen paile destendut:
Andos s’asisent sor un marbre tot nut,
Si ke tapit n'i ot mis n'estendut.
"Dius," dist li pére, "ciers fils, con t'ai pierdut!"
Respont li mére: "Peciés le m’a tolut."
L’espose crie: "mout petit l’ai eut;
Si grand duel ai k’onkes mais tés ne fut."
PageV01P292
Es vos l’espose dolente et esmarie,
Si est le mére au piet agenoillie,
Se biele boce li a trois fois baisie
Et de ses ieus arosée et moulie:
"Dame," fet ele, "kant tes fius m'a laissie,
Or me retien od toi en te maisnie.
Por soie amor, ki tant m’en a proiie,
J’ai Damediu casteet otroiie,
Ke mais d’autre home ne ruis iestre loiie..."
Tantes fois l’a de pitiet embrachie
Ke tote en fut lassée et anuiie.
# |
Li pére escrie: "Ki nos deseverroit
Ja mais le fache Damediu ne verroit.
Kant a men fil veus porter si grant foit,
Dont est il drois chiertes ke mius t’en soit.
Or t’asserrai ja ou mes fius seoit:
L’amor tenras et l'honor k'il tenoit;
Et si metrai mes biens sor ten destroit,
Ke s’il est hon ki t’en mostrast bufoit
Ja mais nul jor mes cuers ne l’ameroit."
Kant chele entent k’ensi le mainterroit,
Au cordoan l’en veut aler tot droit;
Mais li frans hon en ses bras le rechoit,
Et si l'en baise ansdos les ieus estroit.
# |
Dont prent li pére ses messaiges errant;
Par pluisors tieres fait quierre sen enfant.
Droit en Alis en vinrent doi errant:
Iluekes truevent saint Alexis seant
Entre les povres a l’aumosne seant.
Si a muet sen vis et sen semblant
Ke il ne l' pueent raviser tant ne kant,
Mais lor aumosne li presentent devant;
Il le rechoit liement en plorant,
PageV01P293
Et s’en aore Damediu le poissant
De ches siens siers cui il est aumosnant.
# |
Il fut lor sire, or est lor aumosniers:
Tel goie en a k’il en fut plus legiers.
Li siergant cherkent tot adies les mostiers
Et les grans rues et les palais pleniers,
Si en demandent borgois et cevaliers;
Et il les suit et escoute derriers,
Se dou fuir li seroit pas mestiers.
# |
Li siergant sont anuiiet de baer
Et de l' cherkier et de le demander:
Ciés un borgois sont alet por disner;
Car hon ki vait ne puet mie juner.
II les porsuit tant k'il les vit entrer;
Por l’ocoison de l’aumosne rover
Ala a l'uis lor raisons escouter...
"Signor," dist il, "mout vos voi dementer."
Et chil respondent: "Ne fait a oblier.
Pierdut avomes un gentil baceler,
Le fil au conte ki Rome doit warder;
N’ot plus d’enfans, mout le devoit amer,
Tant k’il le fist une dame esposer;
Mais il le fist a forche...............
Fuis s’en est en essil decha mer.
Li pére en cuide esragier et dierver,
Se douche mére ne l' puet entroublier;
Et li puchiele ki tant le pot amer,
Sos chiel n’est hon, s’il li ot regreter,
Ne li estueve d'ansdos les ieus plorer.
Or le cuidames chi iluekes trover,
Mais ne l' poons veir ne encontrer:
Avoirs nos faut, n'avons mais ke doner;
Vuelliens ou non, nos en convient aler."
PageV01P294
Dist li borgois: "N’en faites a blasmer."
A ichel mot font lor tables oster,
Si comenchiérent ariére a retorner.
# |
Kant li sains hon les vit si eslonghiés,
Et si cuida ke ja mais n’iert tociés,
Ne vos sai dire con forment il fut liés.
Cuert en l’eglise, si ciet l’imagene as piés...
Ke le puchiele pardoinst tos ses peciés
Et ke ses cors ne soit mais vergoigniés,
Ne de nul home adesés ne tociés,
Ne par diable soduis ne engigniés.
Es vos a Rome les siergans repairiés:
Nonchent au pére ke ja mais n’iert bailliés.
Or poés croire ke mout en fut iriés.
# |
Li siers Diu est en Alis remansus:
Dis et siet ans s’i est si maintenus
Ke en ses piés nen ot solers viestus,
Ne nus iviers n’i est si fors keus
Ke au mostier ne soit anchois venus
Ke li provoires soit de sen lit issus
Ne de matines li premiers cous ferus.
Ne se fait pas emparlés ne agus,
Ains est taisans con s’il estoit tos mus,
Et del diable s'est si escombatus
K'ainc ne pot iestre por lui si convaincus
Ke uns sos mos soit de se boce issus.
# |
Sains Alexis a se car relenkie
Et en chest siecle l’a si por Diu honie
Ke en se boce nen entre de pain mie
Se cascun jor par les uis ne l' mendie.
Et le chitet par aime tant et prise
PageV01P295
Ke mais par lui, se il puet, n’iert werpie,
Tot por l'imagene ki’st de sainte Marie
A cui il siert et de nuit et de die.
Grant peine mist en le cheleste vie.
# |
Kant li sains a le bore si enamet
Ke ja n'istra mais par se volontet,
Li sainte imagene dont jou vos ai contet
Chele a le costre dou mostier apielet:
"Frére," dist ele, "jou t’ai araisonet
Por un signor de grant nobilitet
Ki por moi a en cheste vile estet
Dis et siet ans en mout grant povretet;
Le biel sierviche ke il m’a presentet
A nostre sire mout recoillit en gret.
Or va, si l' quier tant ke l’aies trovet,
Car bien est drois ke chil de le chitet
Le reconoissent et sacent se bontet."
Es vos le clerc forment espoentet:
Le mostier cherke et de lonc et de let,
Et Alexis a trois fois encontret;
Mais voirement ne cuide ne ne set
Ke ses cors soit de si grant dignitet:
Maintes fois l’ot fors dou mostier botet
Et laidement castoiiet et coset
Et soduiant el pautonier clamet.
# |
Li ciers revint a l’imagene en plorant:
"Dame," dist il, "par tot vois espiant,
Mais ne truis home ki soit de tel semblant,
Ki tant soit dignes ke vos alés disant."
Ele respont: "Trover le pues seant
Derrier chel uis, en sen sautier lisant."
Quiert le li clers, chele part vint corant;
tot droit au piet keus li est errant:
"Sire, mierchit por Damediu le grant!
Te sainte vie tu nos as chelet tant
PageV01P296
Ke nos en somes enviers Diu meserrant.
Sains Alexis en veut aler fuiant,
Mais li bons ciers le vait bien fort tenant
Et les canones dou mostier apielant:
Si lor aconte paoros et tremblant
De chele imagene ki li fist le comant
Ke le saint home lor amenast avant,
Et ses bontés lor fesist entendant.
# |
Kant chil oirent le clerc chou raconter
Ke nostre sire fist l'imagene parler
Por chel saint home conoistre et demostrer,
Communeument le cuerent aorer,
Et si le vuelent a evesque alever:
Mais il ne l’puet sofrir ne endurer.
Kant il voit chou que l’vuelent honorer
Et dou grant fais dou siécle remboer,
"Chiertes," dist il, "chi ne quier mais ester,
Car de rikeche ne d’orgueil demener
Ne puet nus hon paradis acater."
A mienuit lor escape li ber,
Et vint fuiant droitement a le mer:
Pries est li barge ki outre doit aler,
Done sen pris, si se fait metre en mer:
Droit viers Corsant en cuidiérent aler,
Mais nostre sire ne’s i laissa sigler;
Viers sen pais fist le barge torner
Et a siet liues pries de Rome ariver.
# |
Et kant li sire voit Rome le major
Ou il fu cuens desos l’empereor,
Or saciés bien k’il en ot grant paor.
Se l’voit ses pére et si franc vavassor,
Se france mére ki meine grant dolor,
Il le prendront par forche et par vigor,
Si l’embatront en le tierestre honor.
PageV01P297
A orison se couce de paor,
Si en apiele Jesu le creator:
"Hai!" dist il, "dous fius sainte Marie,
Se toi pleust, jou ne vausisse mie
K’en chest pais fust li barge vertie.
Se m’voit mes pére ki Rome a en baillie
Et chele mére ki si en est irie
Et li puchiele ke jou ai delaisie
Et me maisnie cortoise et enseignie
Cui jou avoie si douchement norie
Il m'embatront en chele mortel vie,
Si me tauront le toie compaignie.
# |
"Ha Dius !" dist il, "biaus pére glorios,
Or me deffent dou diable engignos
Ki de mal faire a le cuer si voisos,
Ke ne m'embate en mil plait perillos
Dont viers toi soie coupables ne hontos.
Or sai jou bien, biaus pére glorios,
Ke mi parent sont forment corechos
Et de men cors a veir desiros:
A iaus irai parler un mot ou dos;
Ne l' saront ja, car tos sui cativos:
Mes vis est pales et desfais et hisdos.
# |
"Conduit me done, sire, par tel devise
Ke n’i soit m’arme pierdue ne maumise
Et en infier el fu ardent esprise.
Kant jou arai lor biele aumosne prise
Et si lor cose et veue et enquise,
Lues m’en irai faire le tien siervise
Tant ke j’arai si te grache conquise
Ke en ten regne par toi soit m’arme prise
Et od tes angeles coronee et assise."
PageV01P298
Sains Alexis est issus de le mer;
Tant est malades k’a peine puet aler.
Or se comenche li ber a porpenser
K’a Rome ira sen pére araisoner
Et en grigois en tel wise parler
K'a sen romanc nel pora aviser,
Et se provende li vaura demander.
Se Diu plaisoit ke li vausist doner
Ja mais de lui ne vauroit remuer.
Ne en se sale nes une fois entrer,
Mais cha defors en un pulent angler
Ou on soloit l'iave des mains gieter
La i fera un lit tot estorer,
Si i verra cascun jor au disner
Les grans deintiés par devant lui porter,
Nient por ichou k'il en doive goster,
Ains les fera se bouce desirer;
Car en chest siécle veut si sen cors pener
Et de peciés purghier et eslaver
Ke li diable ne sacent ke clamer.
Or se despoille por lui atapiner,
Si vait a Rome a sen pére parler.
Tres ore ira ses aumosnes user,
Car des autrui ne se veut encombrer.
# |
Sains Alexis s’en vait a abandon,
Et vint a Rome apoiant d'un bordon.
Or plot a Diu ki vint a passion
Ke le sien pére encontre li frans hon
Et puis se mére par devant lor dognon:
Dou mostier viénent saint Piére el pret Noiron;
De lor enfant sont en mout grant frichon.
Il vint avant, si’s enclina parfont:
"Eufemien, escoute me raison.
Herbierghe quier por Diu le roi dou mont
Et por ten fil Alexis le baron.

PageV01P299
Ke Damedius ki warit Lasaron
Et Moysant de le main Pharaon
Te renge encore ten fil en te maison!"
# |
Kant ot li pére de sen fil Alexis,
Tant forment plore des biaus ieus de sen vis
Ke tos en fut moilliés li ciers samis
Et les grans gueles dou bon pelichon gris
Viers lui s’en tome, si l’a a raison mis:
"Hostel aras, biaus frére pelerins,
Tot por l’enfant cui jou soef noris;
Ne te faura ne pains ne cars ne vins.
Ke Dius le mire tos chiaus de paradis
Ki le herbierghent par estrange pais !
Or a estet dis et siet ans caitis;
Dolens peciére! ne sai s’est mors ou vis."
# |
Es vos iluec dant Costentin venant;
Viers lui s’aproce, se li vait consillant:
"Biaus pelerins, onkes n’alés avant.
Od moi herbierghe por amor Diu le grant;
Ne te faurai en trestot men vivant."
Sains Alexis li respont maintenant:
"Sire", dist il, "nos le trovon lisant
Ke pèlerins ki vait par tiere errant
Et Damediu et ses sains requierant,
Il ne doit pas hostel aler cangant,
Et s’il herbierghe a hostel mendiant
Ne le werpir por hostel au manant;
Et s’il le fait mout se vait foliant:
Ne puet prisier tote se vie un want."
# |
Or voit li mére ke chius li veut tolir;
Tant est dolente k’ele ne puet sofrir.
A jointes mains le corit resaillir:
"Sire", fait ele, "tu nos veus mal baillir,
PageV01P300
Kant por l’enfant ke jou tant doi cierir
T’ai herbierghiet, et or me veus werpir.
Ja ferai jou trestot le tien plaisir;
N’i aras mal dont te sace warir."
"Dame", dist il, "jou ne l’vos puis merir:
Dius herbiert t’arme quant deveras fenir
Et le chelui ki t’a a mainburnir,
Et a l’enfant por cui me veus siervir
Doinst tel coraige k’a toi puist revenir."
Ot le li mére, si gieta un sospir.
# |
Sains Alexis se waite mout forment;
Le sien cier pére rapide bielement:
"Sire", dist il, "un petitet m’entent:
Jou te proiai trestot premierement
Por l’amor Diu le pére omnipotent
Et por l’enfant dont jou te voi dolent;
Si me priestas chiertes mout bonement.
Malades sui et enfers durement,
Si ne puis mie monter el pavement;
Mais or me fai un poi d’habitement
Sos le degret ki dou palais deschent,
Ou jou me puisse gesir paisiblement,
Et si me pais de chel menut frament
Ki dou manghier remaint devant te gent;
Ke Damedius par sen comandement
Te renge encore l’enfant en ten comant
Dont tu as si le cuer triste et dolent."
# |
Kant s’ot li pére del fil araisoner,
De ses biaus ieus recomenche a plorer:
"Boins hon", dist il, "Dius te puist respasser!
Tot por l’enfant por cui le veus rover
Trop te ferai et pain et vin doner
Et un bon lit en chel angle estorer;
PageV01P301
Ke Dius le puist tot chiaus werredoner
Ki bien li font a l’hore dou disner
Et a le nuit dou lit et dou soper!
N’est mie saus ki ne veut retorner."
Ot le li dame, si comenche a pasmer.
# |
Li mére pasme trois fois en un tenant,
Li pére va si ses mains detorgant
Ke a le tiere l’en sont keut li want:
Sains Alexis li rendit maintenant.
Kant il les vit si aler sospirant,
Iriès en est, mais n’en fait nul semblant
Car il cremit k’il ne le conoissant:
De tot en tot a a Diu sen talant.
"Jesus", dist il, "ki mains en Oriant,
Kés amistiés est de mére a enfant!
Chis trés grans dues k’il vont por moi menant
Or m’est legiers, si l’troverai pesant:
Au grant juise me revenra devant.
Ajue, Dius, con en sont desirant !
S’or me voloie faire a iaus conoissant,
Tel goie aroient onkes n’orent si grant."
"Dius", dist li pére, "se j’avoie un siergant
Ki me wardast chel pelerin errant,
Jou l’franciroie trestot de maintenant."
Un en i a ki s’en presente avant:
"Jou l’warderai, sire, par ten talant,
Mais nel ferai chiertes ae poi no grant
Por le francise ke me vais presentant,
Mais por l’amor au tien gentil enfant
Le siervirai a trestot men vivant."
# |
Atant en est li rices hon alés,
S’en a se femme et ses barons menés;
Alexis est en le plache ariestés.
Li bons siergans cui il fut delivrés
PageV01P302
L'en adiestra droit desos les degrés:
De l’iave caude li a ses piés lavés
Et ses drapiaus escos et esgratés.
"Sire", dist il, "un petit m’atendés
Tant ke uns lis soit ichi aportés
Et uns lincheus ki mout soit blanc bués."
Dist li sains hon: "Amis, ne vos penés.
Ja mais sor lit ne gira mes costés,
Mais une nate s’il vos plait me quierés."
"Volentiers, sire, kant vos le comandés."
Il lui a quise, si s’en est mout hastés:
De tot en tot li fait ses volentés,
Viers sen signor n’en veut iestre coupés
Ne enviers Diu coupables ne damnés.
Buer vit le jor ke li fut comandés,
Car il en iert en glore coronés.
# |
Puis a li pére sovent sen fil veut
Et chele mére en cui costet il jut
Et li puchiele ki tant l’ot atendut,
Ke onkes nus de rien ne l’reconut;
Ne ne li ont demandet n’enquesut
Kés hon il ert ne de kel tiere fut,
Et le cors saint voirement ne calut
Sen pére voit mout sovent irascut
Et en le sale sovent grant duel esmut
Trestot por lui k’il ont ensi pierdut:
II les eswarde, et si s'en fait si mut
Ke s’on l’avoit a un grant pel batut:
A Diu se tient par itéle viertut
Ke lui ne caut de parent ne de drut.
# |
Signor, mout fait chis sains cors a prisier,
Ki tote Rome avoit a justichier
Et qui peust mener tant cevalier,
PageV01P303
Et convierser od se gente moillier.
Et si s’ala por l’araor Diu coucier
Sos ses degrés a wise d’aumosnier.
Ki vos vauroit tot sen siécle anonchier
Ja vos poroit mout forment anuiier.
Kant li siergant ke il ot a baillier
Li aportoient le grant relief entier.
Un poi en prent por se fain apaier
Et l'autre rent a chiaus ki ’n ont mestier:
N’en fait musgot por sen cors encraissier.
Cascune fieste se fait comuniier;
Tot si conseil repairent au sautier
Dou Diu sierviche ki le rave efforchier.
Et li sains hon ne s’en veut atarghier,
Ains en fait tant c’on s’en puet mervillier.
# |
Sains Alexis vit desos le degret.
Se france mére l’a sovent revisdet
Et de bien faire sen conseil demandet.
Mais voirement ne cuide ne ne set
Ke che soit chil ke tant a regretet.
Li felon sierf li font mainte viltet:
Il prendent l’iave kant il ont parlavet,
Si le reviersent chelui sur le costet
Cui sierf il sont par droite naitet;
Mais li sire a le cuer si afermet
Ke le rechoit trestot par caritet:
Jesu en proie par bone volentet
Ke lor pardoinst par le siue bontet
Tuit l'escarnissent, si l’tiénent por bricon;
Des laveures li moillent sen plichon,
Et li Diu siers s’en couce a orison,
S’en proie Diu par bone entenchion
K’il lor en fache et mierchit et pardon.
Par une fieste de sainte rovison
Deschent li pére cha jus de sen dognon,
PageV01P304
Et voit sen fil ki gist el grabaton;
Chele part vint si l'a mis a raison:
"Biaus crestiens; ne savomes ten non.
Faut toi conrois ki soit en me maison?"
"Chiertes, biaus sire, Crestieu ai a non
Et tut ichil ki a Diu parverront.
Ki bien le warde s’en a grant werredon,
Et chil ki l’piert mar vit onkes le non,
Car s’arme en iert en infier le parfont.
# |
"Chiertes, biaus sire, bien a droit me només:
Crestiens sui voirement apielés,
Se tant sui boins ke par moi soit wardés:
En saint batesme me fut chis nons donés,
Mais jou l’crien pierdre par mes grans ordeés.
Trop ai conroit: cliis en soit honorés
Por cui amor il m’est si apriestés,
Et il vos renge l’enfant ke tant amés."
"Boins hon", dist il, "ke me ramentevés?
N’est mie vis kant il n’est retornés."
Vait s'ent li pére dolens et effraés,
Et li fius est remés sos les degrés.
# |
Es vos se mére fors de le sale issue
Et les degrés contreval deschendue,
Od li l’espose ki si est irascue
K’ainc puis chele hore ne fut en giu veue
Ne de cier paile ue d’ermine viestue
K’ele en le cambre fu sole remansue.
Kant il les voil tos li sans li remue:
Crient ke se mére ne soit apercheue
Et par peciet ne l' conoisse se drue.
De le paor k’il en a recheue
Trestot li vis et li cors li tressue.
# |
Sovent les voit et venir et aler
Et de lor ieus mout tenrement plorer,
PageV01P305
Trestot por lui ke ne pueent trover:
N’est tant hardis qu'es ost araisoner,
Ke au romanc ne l' puissent raviser
Et ne le fachent dou siécle rencombrer.
Li dame prent l’espose a apieler:
"Chiertes, puchiele, mout fort me doit peser:
Chis hon n’a mie en viers moi le cuer cler;
Tant ne me voit par dalés lui passer
K’il me vausist nule cose rover
Et le color dou visaige mostrer.
Car li faisomes ses drapiaus relaver."
Dist li puchiele: "Alon a lui parler
Et de sen non enquierre et demander.
S’or le laissomes entre nos devier,
Et par sen non ne l' savomes nomer,
Trestos li siècles nos en pora blasmer."
# |
"Chiertes, puchiele, jou i vois mout envis:
Quant jou le voi moi sovient d'Alexis:
Por un petit ne l' resemble dou vis;
Li dues de li m'ochira ains mes dis."
Passa avant, si l’a a raison mis:
"Con avés non, biaus frére pelerins?"
"Crestiens, dame, par foit le vos plevis..."
Tant s’esforcha ke le piet li a pris,
Si li cria mierchit li Diu amis.
# |
"Sire," dist ele, "de coi m'alés proiant?"
"Me biele dame, jou l' ferai entendant:
Kant jou premiers vinc en te cort errant,
Si te proiai l’hostel por Diu le grant
Et por l’amor Alexis ten enfant;
Ainc puis chel di n’eus le cuer goiant,
Ne ne venis par devant moi passant
Se me veisses n’en alasses plorant.
PageV01P306
Dou ruiste duel ke vois ramentevant
Meffais en sui, jou l' sai a eschiant.
Pries est me fins, car mout vois agrevant;
Si l' me pardone por l’amor Diu le grant."
# |
Tant a li sire et proiiet et ploret
K’eles li ont werpit et pardonet
Ire et descorde et male volentet.
Atant s’en tornent, ke n’i ont plus parlet,
Et il remest tos sos sos le degret.
Dis et siet ans i a si convierset
Et autretant en Alis le chitet:
Ne but de vin ne de car n’a gostet,
N’onkes nus hon ne devit se bontet.
Or vint li tiermes a chel boneuret
Ke si travail li iérent presentet
Et ens el regne Jesu werredonet.
Pries est se fins si que trés bien le set:
Sen bon siergant a a lui apielet.
# |
"Frére," fait il, "jou morrai le matin;
Ne te lairai ne argent ne or fin,
Car jou nen ai fors ke chel sol tapin.
Mais Damedius, ki ama saint Martin
Por le mantiel k’il dona au frarin,
II le te mire au jor de ten defin!
Or me quier, frére, et encre et parcemin:
Si escrirai un petit de latin."
"Volentiers, chiertes, bel frére pelerin."
# |
Li bons siergans.................
Kant il entent ke doit aler de vie
Et ke pierdra se sainte compaignie,
Tres ichele hore ke l' prist en mainburnie
Li a si bien se volentet emplie,
Onkes n’i ol mautalent ne envie,
PageV01P307
Ne a le mort ne l' veut corechier mie:
L’encre li a destrempée et boulie.
Et puis le cartre mout tost aparillie;
Et li sains hon si escrist ens se vie,
Puis l’a remise en le siue baillie,
Ke ne puist iestre veue ne oie
Trueske li arme soit dou cors departie.
# |
Kant ot li sire escrit et embrevet
Trestot le siécle ke il a demenet,
Et coupe dite et sen peciet ploret,
Et pris le cors dont nos somes sauvet,
Dont li tramist li rois de maistet
Le vois dou chiel ki bien l’a confortet.
Chou dist li vois a chel boneuret:
"Vien ent, cier frére, no sire t’a mandet,
Por cui tu as ten gent cors si penet;
Si l'as siervit selonc se volentet
K’en paradis a ten lit estoret."
# |
Puis i revint une autre vois cantant,
Ke tot oirent li petit et li grant
Ki a chel jor a Rome erent vivant;
Chou dist li vois: "Peceor nonsaçant,
Car alés quierre le Damediu siergant
Ki gist a Rome entre vos languissant,
Ki doit transir de chel siécle dolant,
Si s’en ira od les angeles cantant
La sus el chiel el regne demanant.
Sos uns degrés le troverés gisant,
Sor une nate a loi de mendiant:
Se li proiiés a Damediu le grant
Vos soit aidans de chel jor en avant,
K’il vos warisse dou dragon soduiant
Ke ne vos traie en infier le puant."
Chil ki l’entendent en vont mout sospirant
Et l'uns a l’autre achiertes demandant
PageV01P308
Ou chis sains cors puet iestre chelés tant
Dont li vois Diu vait par Rome criant.
# |
Sains Innochens estoit donc apostoles,
Et sains Acaires et li siens frére Honores
Estoient roi adonc a chel tempore.
Si ont mandet de Rome tos les ordenes,
Et tot le puele, les mauvais et les povres,
Si lor requièrent conseil de cheste cose.
# |
Sains Innochens est mout espoentés:
Od sen clergiet est a le tiere alés,
Dient lor saumes, si ont lor cans levés.
Et li doi roi ke jou vos ai només
Et tos li pueles ki la est asemblés
Proiérent Diu par grans humilités
K’il lor demostre par les siues bontés
Ou chis sains hon pora iestre trovés.
Iluec ont tant de grans sospirs gietés
Ke nostre sire par les siues bontés
Les a trés bien par se vois confortés.
# |
Chou dist li vois: "Trop i estés par foit:
Sempres sera li cors sains a destroit,
A le maison Eufemien lot droit."
# |
"La est li sire dont vos ancui orés:
Par lui sera chis regnes honorés
Et tos li pueles de Rome governés."
# |
Li apostoles fut mout saintismes hon
De le vois Diu entent bien le raison,
K’Eufemiens li cuens de Pret Noiron
Il chel Diu sierf avoit en se maison.
En piés se dreche, si fine s'oraison
Et vint au conte, si conte se raison:
"Chiertes," dist il, "fait as grant mesprison,
Ke tant nos as chelet che saint baron
PageV01P309
Dont Dius nos fait si grant anonchion.
Mostre le nos, si le deproieron
K’il des peciés nos fache vrai pardon."
# |
Eufemiens en a mout grant paor,
Car l’apostoles et li empereor
Et li abet et li rice contor
Crient sor lui et meinent grant tenchor:
"Mostre nos tost le sierf au creator."
"Baron," dist il, "mierchit por Diu amor.
Je vos jurrai sor le saint Sauveor
Ainc mais n’oi parler de se valor."
# |
Eufemiens lor a sor tos criet:
"Ainc mais n’oi parler de se bontet."
Mais iaus ne caut de kank’il a juret,
Ne font nes tant kll l'aient escoutet;
A sen palais en sont trestot alet.
Il cuert devant et l’a bien enchenset.
Li apostoles et li saintisme abet
Et li doi roi et li rice barnet
Viénent avant et si l'ont demandet;
Puis si s’asisent es bans ki sont paret; .
Et li frans cuens ki le cuer a senet
Prent se maisnie a un conseil privet,
S’es conjura de sainte caritet
Ke dou cors saint li dient veritet:
Il dirent tuit ke nus d’iaus ne le set..
Ke chou soit chius ki gist sos le degret
Cui tantes fois ont mouliet et gietet.
# |
Li baron sont par le palais assis.
Et li espose cuert a saint Alexis:
"Sire," fait ele, "mout vos torble li vis."
"Chiertes, puchiele, or m’aproce me fins.
Grant paor ai por chou, le te plevis:
Vois ke chi a de ches noirs anemis;
PageV01P310
Dolent chelui ki en lor mains ert mis!
Diu en ai jou de mes dos piés requis,
Le saint sepulcre ou il fut mors et vis:
Encor est chi li palme et li espis
K'ai en l’honor saint Abraham cueillis.
A men cavet, kant en le tiere ierc mis,
Le me plant on, si sera lues repris.
Dius le te mire les biens ke me fesis:
Esforche toi de quierre paradis.
# |
"France puchiele, pense d’ensevelir.
Maint bien m’as fait, Dius le te puist merir!
Tot mi parent seront a l'enfoir:
Me mére iert la, ne pora i faillir,
Si iert li pére ki moi engenuit,
Et une dame ke jou doi mainburnir;
mout fut dolente kant de moi se partit."
Ot le li biele, si gieta un sospir.
# |
"Sire," fait ele, "ou sont li tien parent,
Kant il verront a ten definement?
Dont sont il chi voisin proçainement?"
Ne puet parler ne respondre nient:
Car l’arme en est alée douchement.
Con buer fut nés ki a chelui se prent
Ki les siens siers si biele mierchit rent !
Li angele sont iluec tot en present,
S’emportent l’arme viers le chiel liement.
Li sain de Rome sonent communeument,
Si ke nus hon n’i sace ne n’i tent,
Mais de lor gret sonent si douchement
K’ainc mais n’oirent nul son tant douchement.
Kant l'espose ot le miracle tant gent,
Ens en sen cuer se pensa et reprent
K’ele n’i fut venue plus sovent.
PageV01P311
Et li siergans ki l’aime si forment
Il cuert au pére, si li dist coiement:
# |
"Sire, Dius a recueillit ten paumier.
Dis et siet an sont passet tot entier;
Tu le m’as fait sos ten degret waitier,
Ains une fois ne l' peuc faire baignier,
N’ains puis n’en ot autre coute au coucier
Fors une nale et un poi d’estramier;
Onkes nul jor ne l' seuc tant anuiier
K’onkes vausist ke une fois manghier.
Ch’est li Diu siers, bien le t’os aficier,
Dont chil signor te vuelent emplaidier,
Ke Dius nos fait par se vois anonchier."
Ot le li pére, Diu prent a grachiier.
Tot soef ist dou grant palais plenier,
Si ke n'i meine siergant ne escuier;
Devant sen fil s’en vait agenoillier
Le brief li veut fors dou poing esracier,
Mais li sains cors ne li vout pas baillier.
# |
Es vos le pére dolent et eswaret;
Laisse sen fil si com il l'a trovet,
Si remonta sus el palais listet,
A haute vois lor a sor tos criet:
"Uns pelerins gist mors sos men degret:
Dis e siet ans a od nos convierset;
K’ains nus de nos ne devit se bontet;
Et tient un brief en sen poing ensieret:
Jou le vauc prendre, mais il le m’a veet,
Ke tres bien sai ke mout forment me het
Et malement en ai viers lui erret.
Sire apostoles, vien i par te bontet
Et si me done conseil de veritet."
# |
Li apostoles fut mout saintismes hon,
Si escouta dou pére le raison,
PageV01P312
Et des sains angeles entendit l’orison
Ki portent l'arme a grant porchession:
Viers le degret s’en corut a bandon,
Et apries lui tot li autre baron.
Apielet l’ont, mais ne sévent sen non,
Et deviers lui cient a orison,
Et si se misent en grant affliction.
# |
A vois escrient li doi empereor:
"Mierchit, ciers sire, por le toie douchor.
En ichest siècle nos fait Dius tel honor
Ke desos lui somes govreneor;
Mais l’apostole tenomes a signor.
Lisiés la cartre, sire, por Diu amor,
Si nous dirés s’honor et se valor."
# |
Kant l’apostoles ot le raison oie
Ke li doi roi ont por lui obeie,
Devant le saint s’abaisse et humelie:
Le cartre a prise a se main saintefie;
Li sains li a douchement consentie;
Puis le desploie, si veut lire se vie,
Mais Diu ne plot le fil sainte Marie:
Fors de ses mains li est esvanuie.
Et en le sein l’espose en est salie.
# |
Chi puet on bien aprendre et escouter
Ke esposailles font forment a amer:
Ke a se mére ne vout li cartre aler
Ne sor sen pére caoir ne ariester,
Mais sor l’espose le fist Dius ariester,
Ke cascuns hon doit se femme honorer,
Aussi les dames lor signor bien warder;
Et ki ne l' fait trés bien se puet fier
Dedens infier l’eu estovra aler
Od les diables tot de fi convierser.
PageV01P313
Or fut li cartre sor l’espose ariestée,
A l’apostole en est a tote alée:
"Sire," dist ele, "jou sui mout eswarée."
"Biele," dist il, "a bien fussiés vos née.
Toie est li cartre, Jesus le t’a donée
Et li cors sains ki le t'a presentée.
Or le fai lire, car a toi est alée:
Cui ke toi plait doit iestre délivrée."
Ele eswarda les clers de le contrée:
Un cardonal a le cartre livrée
Ki tos jors ot sainte vie menée.
Chis list le cartre et chil l’ont escoutée:
D'ichele gemme ke iluec ont trovée
Lor a le non et le vie contée,
Et le sien pére et se mére nomée
Et le puchiele ke il out esposée;
Et le moitiet de l’aniel ont trovée
Ens en le cartre tres bien envolepée,
Dont le moitiet li ot recomandée;
On li demande, ele l’a aportée;
L’une part a a l’autre rajostée.
Et nostre sire l’a tres bien rasoudée.
Iluekes ot tante vois escriée,
Et tante barbe desacie et tirée:
Ains puis ke Rome fut premiers estorée
N’i ot, jou cuit, si grant dolor menée.
Kant ses ciers pére ot le brief et entent
Ke ch'est ses fius ki la gist si forment,
Si grant duel a a poi d’ire ne fent:
"Fius Alexis, hui me fais si dolent!
Ke ja mais n’ierc un sol jor sans torment."
# |
Chou dist li pére: "Ai, fius Alexis,
Encore hui main atendoit chis caitis
Ke tu deusses a moi repairier vis
PageV01P314
Et conforter les tiens dolens amis.
Mout m’esmerveil ou tu chel cuer presis:
Ains une fois siervir ne te fesis."
# |
A haute vois a li pére escriet:
"mout male warde t’ai fait sos men degret.
Dolens peciéres, con eue le sens diervet,
Ke de tant jor n’ai men fil revisdet!
# |
"Fius Alexis, con doleros messaige!
A kel torment as uset ten eaige!
Comment eus si vil ten grant paraige
Et ten espose et ten rice barnaige,
Ke tant jor as chi giut a tel hontaige?
Tel duel me fais a poi ke vis n’esraige.
# |
"Fius, ki tenra mes larges hiretés
Et mes alues et mes grans fermetés
Et les palais dont jou avoie assés?
Por toie amor m’en estoie penés,
K’apries me mort en fusses hiretés."
# |
Kant li mére a le dolor entendue,
Par mi le priesse est a sen fil corue,
Et voit gesir se car trestote nue
Mout povrement sor le nate velue,
Par mi le cors fust pasmee keue
Kant li signor l’ont entre iaus recheue.
# |
Li france femme se traveille et demente:
"Fius Alexis, mout m'as faite dolente.
Comment eus si trés vil te jovente?
Ja sui jou ore de chités si manente
Bien t’en fesisse doner soissante ou trente.
# |
"Dius," dist li mére, "con pesant aventure!
Mout m’esmerveil ke li miens cors tant dure.
Ke il ne rnuert de duel et de rancure,
PageV01P315
Ke chi voi morte tote me porteure:
Ja mais n’arai chiertes du vivre cure."
# |
Par mi le priesse estes vos le puchiele
Ses crins sacant et batant se forchiele,
Et si se claime et cailive et mesiele:
Par mi le priesse fust pasmee li biele,
Kant l’apostoles le retient et apiele,
# |
L’espose crie cou femme forsenee:
"Frére Alexis, con longhe demoree
T’ai atendut en le cambre chelee,
Kant me laissastes dolente et eswaree !
# |
"Sire Alexis, tant jor t’ai awardet
Et tantes larmes por le tien cors ploret!
Se te seuisse chaiens sos le degret
Ou tu as giut de si longhe enfretet,
Jou ne l' laissasse por trestot chest regnet
K’ensemble od toi n’eusse convierset."
# |
Dist li puchiele: "Gentius cors prechios,
Ou trouvas tu chel cuer si mervillos
Ke me veis dedevant toi tans jors
Por le tien cors mener si grans dolors,
K’ainc ne t'en prist ne pitiés ne douchors?
# |
10"Or par sui, sire, keue en veveet:
Ja mais n’arai chiertes autre esposet;
Ains siervirai le roi de maistet,
K’en l’autre siècle en le vraie clartet
Puissent nos armes avoir sochietet."
# |
Mout le regrete chil ki lui engenra,
Aussi li mére ki a fil le porta,
Et li puchiele ki tant forment l’ama:
Ains puis chel jor k'il sole le laissa
A nes un home dou siécle ne parla.
PageV01P316
Endementiers que chil troi le crièrent,
Li apostoles et li doi roi ki érent
Mout bielement le Diu sierf atornérent:
Goiant tos chiaus ki aluec habitérent
Et ki le jor de bon cuer l’honorérent.
# |
Dist l’apostoles: "Signor, car esploitomes:
Chou est folie ke nos tel duel menomes
Dont en avant si grant goie atendomes.
Levés vos sus et si nos en alomes
Truesk’ el mostier, ke mais n’i sejornomes."
# |
Atant le prendent, si ont laissiet le crit;
Cantant l'en portent et plorant et marit,
Et si li proient k’il ait d’iaus tos mierchit.
N’estuet semonre chiaus ki l’orent oit:
Tuit i acuerent nes li enfant petit.
# |
...Ne dus ne rois ne set kel part aler.....
# |
Dist l’apostoles: "mout somes encombret.
Por chest cors saint ke Dius nos a mostret
Liés est li pueles ki tant l’ont desiret;
Si ’n i vient tant, se ne sont retornet
Ja en seromes esteint et afolet."
# |
Entre iaus ont pris un hastiu parlement:
De lor tresor prendent l'or et l'argent.
Si l’ont gietet devant le povre gent.
Par ichou cuident venir a sauvement;
Ke lor ajue? il n’en vuelent nient:
A chest cors saint ont trestot lor talent.
# |
A une vois crient li gent menue:
"De chest avoir, saciés. n’avon nos cure.
Fors chel cors saint ne quierons cose nule.
Car par chestui n'arons cose ki nuise.
PageV01P317
Dius, quel grant goie nos est ore venue!
Onkes a Rome nen ot tele veue."
# |
...Tel goie meinent n’est nus ki le vos die...
# |
...Ne nus liepros ne malades ne sors
Ne nus enfers ne nus palasinos
N’i est alés ki ’n portast ses langors...
# |
Aukant i vont, aukant s'i font porter:
Ki plorant vint cantant s’en est alés
N’i a enfer de si grant enfertet
S’il vient a lui ki n’en porte santet.
# |
Sains Bonifaches, que on martir apiele,
Il ot a Rome une eglise mout biele:
Iluec enfueent saint Alexis li priestre;
Mout gentement l’ont poset en le tiere,
# |
Vait s’ent li pueles; et li pére et li mére
Et li puchiele onkes ne desevrérent.....
# |
Con bones uevres, Dius, et con bon sierviche
A chius cors sains menet en cheste vie!
Con buer fut nés ki fait le Diu serviche!
# |
Signor, aiés che saint en grant memore;
Si li proiés por Diu ke vos assoille
Et en chest siecle nos amoneste goie,
Et en chel autre de paradis le glore.
# |
Et de chelui ki le vie en escrist
Devés proiier ke Dius en ait merchit.
Et le siue arme meche en saint paradis;
Aussi les nostres et de tos nos amis,
Par le proiiére le boin saint Alexis.
§Chi define li romans de saint Alesin.
*** END