example-ori-corpus-james-nav.txt

Shí James, Diyin God índa Bóhólníihii Jesus Christ yá naal'a'í nishłíinii, naakits'áadahgo Ízrel dine'é danohłíinii tadanihidi'nooskaadígíí nihich'į' naaltsoos áshłéehgo k'é nihidishní.

Shik'isóó danohłíinii, ał'ąą át'éego nanihídahodi'nitaahgo, baa hózhǫ́ǫgo baa nitsídaahkees, háálá nihe'oodlą' nabídahonitaahígíí bee nízaadgóó ha'jólní áhooł'įįhgo nihił béédahózin. Áko bíni'dii ha'ahóní nihinaalnishgo ałtso ła'yilééh, ákót'éego nihe'oodlą' bee ts'ídá t'áá ákóne' ádanoht'éego índa t'áadoo bee nihich'į' anáhóót'i'ígóó dahinohnáa doo. Nihí ła' bee hódzáanii bídin nohłį́įgo Diyin God bíídóohkił, éí bił hadlee'go índa doo ak'íhá'ááhgóó t'áá ałtso aidii'aah, áko honohsą́ągo ánihidoolííł. Nidi ts'ídá t'áadoo nihił naaki nilíní iinohdlą́ągo yídóohkił, áko doo nihił naanááyoł nidahonohłin da doo. Háálá hoł naaki nilínígíí níyol yááhoołgohgo tónteel yilk'oołígíí nahojílin. Diné ákójít'éii éí t'áadoo le'é Bóhólníihii bits'ą́ą́dę́ę́' nídideeshłééł t'áadoo jiníziní nijigháa doo. Diné naakigo nitsídzíkeesii éí t'áá ałtsojį' doo bééhózingóó nijighá.
Ak'is hojooba' át'éii bohónéedzą́ ábi'diilyaago yaa bił hózhǫ́ǫ le', áádóó ak'is at'íinii bahojoobá'í ábi'diilyaago yaa bił hózhǫ́ǫ le', háálá ajit'íinii ch'ilátah hózhóón niiłnahígi át'éego ahwíidoołkááł. Jó, hadoh bił háá'át'áahgo ch'il néízis, áádóó ch'ilátah hózhóonii ninádahinidah, áko doo t'áá nizhónígo ahool'áa da. T'áá éigi át'éego diné ajit'íinii t'áá joolnishgo ahwíidoołkááł.
Diné nabóhonitaahgo ha'ólnínígíí bik'ihojidlí, háálá na'íhonitaah bik'esdeesdlį́į'go bééhoozingo iináájí naat'á ch'ah Diyin God haididoo'ááł, éí Bóhólníihii ayóó'ádabó'níinii bíí' dooleełgo yee yich'į' haadzíí'. Nahóhodi'nitaahgo, Diyin God nashínítaah, doo jiníi da, háálá Diyin God éí nichxǫ́'íii doo yee na'ínítaah da, áádóó t'áá bí diné doo ła' nayínítaah da. Nidi diné t'ááłá'í jinítínígo nahóhodi'nitaahgo t'áá hó bidázhnoolníinii hodíní'ah áádóó nichxǫ́'íii yiih honi'ah. Áko bąąhági át'éego adáhonooní i'niiltsąąhgo bąąhági át'éii yiłchííh, áádóó bąąhági át'éii niniséehgo aniné nádleeh. Shik'isóó ayóó'ánihósh'níinii, nihida'dódleeh lágo. Yá'ádaat'éehii índa ts'ídá t'áá ákóne' ádaat'éii t'áá ałtso yá'ąąshdę́ę́' aTaa' bee da'di'nídíín áyiilaii bits'ą́ą́dę́ę́' nihaa hidit'aah. Diyin God doo łahgo óonééh át'ée da, doo chaha'oh náhoodleełígi át'ée da. T'áá bí íinízingo hane' t'áá aaníinii bee nínáádanihi'dizhchį́, jó, nihí alą́ąjį' ba'áłchíní nídasiidlį́į́'.
Éí bąą, shik'isóó ayóó'ánihósh'níinii, diné t'ááłá'í jinítínígo hazhó'ó ajíists'ą́ą' doo, nidi tąądee háádziidziih doo, tąądee hánáháchįįh doo. Háálá Diyin God ts'ídá t'áá ákogi át'éego yinaha'áhígíí éí diné bi'áháchį' doo yee ła'yidoolíił da. Éí bąą badaa'ihii índa bąąhági át'éego nitsáhákees k'ee'ąą dadínées'ąądii t'áá ałtso yóó'adahidoh'aah áádóó a'ohgo áda'díínółzingo Diyin God bizaad ayi'di k'ididoolyéełii nídadoohłé, éí nihii' naazíinii yisdáyiiníiłgo yíneel'ą́. Diyin God bizaad bik'eh dahonoł'į́, t'áadoo t'óó dadoohts'a'go ádinida'ohdlo'í. Háálá t'áá háiida t'óó bizaad jidiits'a'go doo bik'eh hojíł'ínígíí éí diné kót'éii nahojílin, diné bii' adéest'į́į́' yii' hazhó'ó ádiníl'įįh, nidi ádiníl'įįhgo áádóó dah diigháahgo ánoolninii t'óó yaa yoonah. Nidi t'áá háiida Diyin God yee has'áanii hadaałt'éii diné yéédiyiichíidii hazhó'ó yii' déez'į́į'go yíhooł'aahígíí, éí ha'át'íhída yaa naagháago Diyin God bik'izhdoodliił, háálá yidiits'a'ii doo yaa yoonééhgóó yik'eh hół'į́įgo át'į́. Diné t'áá háiida shinahagha' hólǫ́ jinízingo, yájíłti'gi doo baa áhojilyą́ą́góó t'óó ádinijidlo'go ájít'į́, éí dinéhígíí hanahagha' t'áadoo nánídlíní da. Áłchíní bizhé'é ádaadinii índa sáanii bąąh ádahasdįįdii bich'į' nidahwii'náago bíká aníjílwo'ígíí, índa nihokáa'gi bąąhági át'éii ádąąh jit'ínígíí éí Diyin God aTaa' nilíinii binááł nahadlá t'áá aaníinii índa t'áá ákogi át'éii át'é.

Shik'isóó, Jesus Christ nihiBóhólníihii, éí Bóhólníihii ayóó át'éii deinohdlą́ągo t'áadoo diné ał'ohgo baa nitsídaahkeesí. Jó, diné ła' óola yoostsah bąąh si'ą́ągo áádóó éé' t'áá íiyisí nizhónígíí yee hadít'éego áłah nohłį́į́ góne' nihił yah ííyáago, áádóó nít'éé' diné ła' bahojoobá'íii anilí yee hadít'éego nihił yah anáánáádzáago, nít'éé' diné t'áá íiyisí nizhónígo hadít'éii t'éiyá nihił nilį́įgo, Kwe'é dah nídaah, bidooniidgo índa diné bahojoobá'ígíí, T'áá aadi sínízį́, doodaii', Shijátahdóó nídaah, bidooniidgo, da' doósh ał'ohgo ahaa nitsídaakeesii dasoolį́į' da? Da' doósh nichxǫ́'ógo aa nitsídaahkeesgo aa nídaat'íinii dasoolį́į' da? Da'íísółts'ą́ą́', shik'isóó ayóó'ánihósh'níinii, jó, nihokáa'gi badahojoobá'íii oodlą' deidoot'įįłgo índa Diyin God bee bóhólníihgo bił haz'áanii bíí' dadooleełgo ts'ídá nábiizláá'. Éí ayóó'ádabó'níinii bíí' dooleełgo yee nihoní'ą́. Nidi diné bahojoobá'íii doo nihił dáálįįd da. Jó, da'at'íinii ts'ídá nihide ádahósin ya'? Jó, aa nídahat'į́įjį' ts'ídá adanihii'éésh ya'? Hó lá yízhí ílíinii bee danihi'dójíhígíí ts'ídá nichxǫ́'ógo bá hadadziidziih. Diyin God bizaad bee ak'e'ashchíinii bik'ehgo Diyin God éí Aláahgo Naat'áanii yee has'áanii kóní, T'áá ni ádííní'nínígi át'éego bił kééhót'íinii ayóó'ííní'ní. Éí bee haz'ánígíí bik'eh dahonoł'į́įgo yá'át'éhígi ádaaht'į́į doo. Nidi diné ał'ohgo baa nitsídaahkeesgo éí nida'iyohsííh, áko bee haz'áanii yilááh nidahidiltaałii danohłį́įgo bee haz'áanii nihainít'į́. Háálá t'áá háiida bee haz'áanii t'áá át'é bik'eh hojíł'į́į nidi, t'ááłáhígo haz'ą́ dzisiihgo, t'áá át'é bee ádihozhdiilt'i'go át'é. Háálá, Ts'ídá doo azhdilée da, nínígíí ałdó', Diné ts'ídá doo diyííłhéeł da, ní. Áko doo adílée da nidi diné síníłhį́įgo bee haz'áanii yilááh nideeltáalii sínílį́į́'. Áko Diyin God yee has'áanii diné yéé'iiłníihii bik'ehgo nihá nihwiit'aah dooleełii danohłį́įgo éí bik'ehgo hadahohdziih áádóó ádaahníił le'. Háálá doo aa a'ááh jiniizį́'ígíí éí Diyin God doo haa a'ááh nízingóó há nihodoo'ááł; aa a'ááh hasin éí aa hwiinít'į́ yik'eh didlį́.

Shik'isóó, diné ła', Ooshdlą́, níigo, nidi bi'oodlą' doo yik'eh át'éégóó, ha'át'íísh bá nídoodleeł? Oodlą' ákót'éii daats'í yisdábidoołtééł? Dooda lą́ą! Ak'is, doodaléi' alah nilíinii ła' bik'i ni'iizt'óodgo áádóó ch'iyáán bee ádingo, yídin nilíinii t'áadoo ła' baa nołéhé, T'óó nílááh, nił hózhǫ́ǫgo t'áadoo nidlóhí índa hwiih nílį́įgo yínááł, bidooniidgo, éishą' ha'át'íí nídoodleeł? T'áá ákót'éego hwe'oodlą' t'áá bízhánígo, ó'oo'níiłii bąąh ádingo, t'áadoo nánídlíní da. Nidi diné ła'da ádidooniił, Ni éí iinídlą́, nidi shí t'éí yá'át'éehgo ááshnííł. Haa'íshą' ááníiłii t'áágééd ne'oodlą' shił ííshjání ánílééh, áko shí ałdó' ááshníłígíí bik'ehgo she'oodlą' nił ííshjání ádeeshłííł. Diyin God t'ááłá'í hólǫ́ǫgo yinídlánígíí éí yá'át'ééh. Jó, níłch'i bida'iiníziinii ákót'éego da'oodlą́ą nidi yik'ee bił daayée'go bitah dahoditłid. Dooládó' diné doo hóyáanii nílíinii, ájooníiłii t'áágééd hwe'oodlą' t'áadoo nánídlíní daígíísh shił bééhodoozįįł nínízin? Éíbraham yę́ę, nihizhé'é nilíinii, bikáá' náá'iiniihí bikáa'gi biye' Áízak niiníłtį́ yę́ędą́ą́' t'áá bí ádzaaígíí bee ts'ídá t'áá ákogi át'éego bá ha'oodzíí'. Jó, Éíbraham bi'oodlą' áádóó ááníłígíí t'áá yił yoołt'ihgo ááníłígíí bee bi'oodlą' ła'yiyiilaaígíí k'ad nił bééhoozin. Áko Diyin God bizaad bee ak'e'ashchíinii kónínígíí bohoolyaa, Éíbraham éí Diyin God joosdląąd, áko ts'ídá t'áá ákogi ájít'éego há haadzíí'. Áko Diyin God bik'is jílį́įgo há ha'oodzíí'. Jó, kót'éego nihił béédahoozin, diné ájooníłígíí bee Diyin God bił t'áá ákogi ájít'é jileeh, hwe'oodlą'ígíí ájooníiłii doo bił joołt'ihgóó éí doo bíighah da. T'áá ákót'éego ałdó' Réíhab, ałjiłnii nilíinii, éí hane' neii'áhí yah ayíí'eezh yę́ędą́ą́', áádóó nák'ee'ąągo ch'ínéiníł'a' yę́ędą́ą́'; ádziidzaaígíí bee Diyin God bił ts'ídá t'áá ákogi ájít'é dzizlį́į́'. Háálá hwii' sizíinii t'áágéedgo hats'íís doo hináa da, t'áá ákót'éego ałdó' ájooníłígíí hwe'oodlą' doo bił joołt'ihgóó t'áadoo nánídlíní da.

Shik'isóó, lą'í nołt'éego na'nitiní daohłe' lágo, háálá nida'niitinígíí t'ah aláhídi át'éego bik'e'ashch'íi'go nihaa nídahódóot'įįłgo nihił béédahózin. T'áá áníiltso lą'ígóó nida'ayiilzííh. T'áá háiida saad doo nidziisííhgóó hadziidziihígíí éí diné ts'ídá t'áá ákóne' át'éii jílį́, hats'íís ałdó' hak'eh hół'į́ ádzósingo bízhneel'ą́. Jó, łį́į́' nihik'eh hół'į́į doo biniyé biza'iilt'ihgo bee bits'íís neidlo'. Tsinaa'eeł ałdó' baa nitsídaahkees; azhą́ ayóó áníłtso nidi, áádóó níyol bidziilii yee naa'eeł nidi, bee naadlo'í áłts'íísí nidi na'ał'eełii t'áá bí nízingóó neilo'. T'áá ákót'éego ałdó' atsoo' áłts'íísí lá nidi ayóó ádaat'éii yee ádaa ha'niih. Jó'akon, kǫ' t'įįhdígo nidi, tsin ayóogo bee hodíłch'ilii yidiiłtłi'! Atsoo'ígíí éí kǫ' nahalin. Atsoo' éí íiyisí doo yá'át'éehii nilį́įgo nihits'íís yee hadít'éii yitah hólǫ́, nihits'íís t'áá át'é niyiiłchxǫǫh. Hool'áágóó ti'hoo'nííh bił haz'ą́ądi hodook'ą́łígíí bits'ą́ą́dóó nihił hoolzhishígíí yidiiłtłi'. Jó, naaldlooshii, nidaat'a'ii, nidaa'na'iida índa tónteel yii' dahólóonii nidi nidahazhǫǫh, éí diné nidabiishǫǫh. Nidi diné éí atsoo' doo yóshǫǫh át'ée da. Doo hasht'edít'éégóó doo yá'áshóonii nilį́, da'agháanii bii' hééł. Éí Diyin God aTaa' nilíinii bee baa dahwii'niih, áádóó Diyin God honáłt'éego diné ájiilaaígíí ałdó' bee dayíníidziih. Azéé' t'ááłá'íígíí bits'ą́ą́dóó saad bee ak'ihojidlí índa saad bee ódziihii hahwiileeh. Shik'isóó, díí doo ákódeiit'į́į da dooleeł nít'éé'! Da' t'ááłá'í tó háálínídę́ę́'ésh tó łikango índa dók'ǫ́ǫzhgo háálį́į łeh? Shik'isóó, fig sikaadgoósh álivz bąąh hodooleeł, éí doodago ch'il na'atł'o'ii sikaadgoósh fig bąąh hodooleeł? Dooda lą́ą! T'áá ákót'éego tó dók'ǫ́ǫ́zh háálį́į́dóó tó łikanii doo hóle' át'ée da.
Nihitahdóoshą' háí hóyą́ áádóó ak'idi'yiitįįh? Háni'dii yá'át'éehgo jiinánígíí áádóó baa hojíyą́ągo a'ohgo íz'dólzingo ájooníłígíí ííshjání ádzósin le'. Nidi da'iinołch'į́įdgo nihii' nidahodik'ǫǫsh ládą́ą́' áádóó ałch'ą́ą́h nidaah'na' ládą́ą́', t'áadoo ádaa dahoh'niihí, t'áá aaníinii t'áadoo bik'ijį' danihiyooch'ídí. Hódzą́ ákót'éhígíí doo yá'ąąshdę́ę́' nihwiileeh da, nidi nihokáa'gi hólóonii át'é, áko doo Diyin God bits'ą́ą́dóó át'ée da, nidi níłch'i bi'iiníziinii bits'ą́ą́dóó át'é. Háálá t'áá haa'ída ooch'į́į́d índa ałch'ą́ą́h na'a'na' hólǫ́ǫgi ákwii doo hasht'ehodít'ée da, áádóó baa'ihii t'áá ałtso baa ooldah łeh. Nidi yá'ąąshdę́ę́' bee hódzáanii éí, átséhí góne' chin bąąh ádinii át'é, áádóó k'é'nídzin, áádóó á'áhwiinít'į́'í, índa lą́ nízin, t'áá íiyisí aa a'ááh hasin índa yá'át'ééh ó'oo'nííł, áádóó ał'ohgo ahaa nitsáhákeesii índa t'óó áhodi'į́ bąąh ádin. K'é nídahoołeełii t'áá ákogi át'éii bineest'ą' bąą hózhǫ́ǫgo k'éédeididle'.

Nihitahgi ahigą́ índa ahinídiiltłáadshą' háádę́ę́' nihwiileeh? Da' doósh nihe'adáhonooni' nihiyi'di naalnishígíí bits'ą́ą́dę́ę́' nihwiileeh da? Laanaa danohsin nidi doo nihee dahaleeh da; nida'ołtseed, áádóó nihił adááh dahaníi nidi doo shódeinołt'eeh dago, t'óó ahináádoohjah áádóó da'ahohgą́. Bídin danohłínígíí doo Diyin God bídeínóhkeedgóó biniinaa doo nihee dahaleeh da. Dayínóhkeed nidi doo nihee dahaleeh da, háálá biniyé dayínóhkeedígíí doo yá'át'éeh da, nihił dahoneełni t'éí biniyé dayínóhkeed. Nihí adiléhí danohłíinii, nihokáá' bił nidahazt'i'ii nihił bidáádahaníigo Diyin God bi'ana'í danohłínígíísh doo nihił béédahózin da? Éí bąą t'áá háiida nihokáá' bił nidahazt'i'ii hoł bidááhánínígíí Diyin God bi'ana'í íz'dólzingo át'é. Diyin God bizaad bee ak'e'ashchínígíí doo t'áadoo biniyéhígóó kóníigo bee ak'e'ashchį́, Níłch'i nihii' naazį́įgo áyiilaii éí laanaa nízingo oołch'į́į́d. Nidi t'ah aláhídi át'éego Diyin God aa jooba', éí bąą bizaad bee ak'e'ashchíinii kóní,
Diyin God éí diné ádaa daha'niihii yik'ijį' nilį́,
nidi diné a'ohgo ádaa nitsídaakeesii yaa jooba'.
Éí bąą Diyin God baa ádadiyoht'aah. Níłch'i bida'iiníziinii binanit'a'í bich'į' nidaałdzilgo nihits'ádoolwoł. Diyin God baa hohkááh, áko bí ałdó' nihaa doogááł. Bąąhági ádaahníiłii, nihíla' táádaahgis. T'áá naaki nilį́įgo nitsídaahkeesii, nihijéí chin bąąh ádaadingo ádaahłééh. Yínííł bik'ee ti'dahoohnííh, áádóó atínidadinohdleeh, índa daahcha. Bíni'dii nihidloh hasinii atínáhodinidleeh náádleeł, áádóó bíni'dii nihił dahózhónígíí éí yínííł náádleeł. Bóhólníihii binááł a'ohgo ádaa nitsídaahkees, áko ayóó át'éii danohłį́įgo ánihidoolííł.
Shik'isóó, t'áadoo nichxǫ́'ógo ahaa yádaałti'í. T'áá háiida Christ bee ak'is nilį́įgo nichxǫ́'ógo baa yájíłti'ígíí, doodaii' baa níjít'ínígíí éí Diyin God yee has'áanii nichxǫ́'ógo baa yájíłti' áádóó baa níjít'į́įgo át'é. Jó, bee haz'áanii baa níjít'į́įgo bee haz'áanii doo yik'ehgóó ááníiłii jileeh, bee haz'áanii yik'i hodii'aahii jileeh. Diyin God t'éiyá bee haz'áanii ííł'íinii áádóó ánihwii'aahii nilį́. T'áá bí t'éiyá yisdá'iinííł, áádóó ałdó' í'doołdįįłgo yíneel'ą́. Áko nishą' ha'át'íí nishłį́ nínízingo bił kééhót'íinii baa nánít'į́?
Haa'íyee', kódadoh'níinii, Díí jį́, yiską́ągoda kin haal'áajį' diikah, ákwii nihaa nida'iiniihgo nídoohah, áko béeso nihee dahodooleeł. Éí azhą́ yiską́ągo áhodooníłígíí doo nihił béédahózin da nidi ádadohní. Jó, nihe'iina'shą' ha'át'íí át'é? Áhí t'óó kónígháníjį' haleehgo ádįįhígíí nahalinii át'é. Kódadohníi dooleeł yę́ę, Bóhólníihii íinízin ládą́ą́' dahinii'náa doo, díidída, doodaii' níléidída baa nidiikah. Nidi ádaa dadzíínóhdlíigo ádaa dahohniih. Ákót'éego ádaa ha'niih t'áá ałtso doo yá'át'éeh da. Éí bąą t'áá háiida ha'át'íhída yá'át'éehgo ádoolníłígíí hoł bééhózin nidi doo ájoonííłgóó éí bee ádił ni'dziilzííh.

Haa'íyee' da'oht'íinii, bik'ee ti'dahwiidoohnihii bich'į' hoolzhishígíí biniinaa dadołwoshgo daahcha. Daaht'ínígíí dadííłdzid, áádóó danihi'éé' ch'osh ałchozhii dayííłchozh. Nihi'óola índa nihibéésh łigaii nídadiniichxii'. Nídadiniichxii' yę́ę bee nihééhodoozįįł, áko nihits'íís dook'ą́ą́ł nahalingo atínihidoolííł. Nihoogháahjį' yoołkáałgo nihinaalye'é hasht'e'nídahisoonil. Jó'akon, nidaalnishí nihidáda'ak'ehgóó da'ííshée'go bik'é na'azhnishii t'áadoo nidasooláa da. Áko nihik'ijį' yádaałti'go hahóół'á. Índa Diyin God éí t'áá ałtsoní bee Bóhólníihii da'ííshé'ígíí hahóół'áago yidiizts'ą́ą́'. Nahasdzáán bikáá' t'áá ałtsoní daaht'į́įgo bee ák'idaahdláago tsi'nisoohkai. Na'atseed bijį́įjį' biniyé nihijéí hwiih danilį́įgo ádaahłaa. Diné ts'ídá t'áá ákogi át'éii bá nidahosoo'ą́ áádóó dasoołhį́, nidi t'áadoo nihich'į' deesdzil da.

Éí bąą shik'isóó, Bóhólníihii nádzáajį' hada'íínółní. Jó'akon, k'éé'dídléehii ni' bits'ą́ą́dóó aneest'ą' ílíinii yiba' át'éego, áłtséedi índa akée'di bik'i nahałtį́įhjį' ha'ólníi łeh. Nihí ałdó' hada'íínółní. Nihijéí bidziilgo ádeínóhsin, háálá Bóhólníihii nídoodáłígíí koshídę́ę́' hadziih. Shik'isóó, Diyin God doo nihá nihodiyoo'aał daígíí biniyé t'áadoo ałch'į' saad dahonoł'íní. Jó'akon, ánihwii'aahii ch'é'étiindę́ę́' sizį́! Shik'isóó, Diyin God yá dahalne'ii Bóhólníihii bízhi' yee yaa dahoolne'go yiniinaa ti'dahooznii' nidi nízaadgóó hada'oosniid. Éí bida'oł'į́. Jó, nízaadgóó hada'oosniidii bił dahózhǫ́, dadii'ní. Job wolyéhígíí nízaadgóó ha'oosniidígíí baa dahosidoots'ą́ą́', áádóó nihoolzhiizhdi Bóhólníihii há í'iilaaígíí nihił béédahózin. Dooládó' Bóhólníihii aa a'ááh nízin da, áádóó jooba' lá! Díí t'áá ałtso biláahgo, shik'isóó, t'áadoo ha'át'íhída bee ádee hadahidohdziihí, yá'ąąsh, doodaii' nahasdzáán bee nidi dooda, t'áá ha'át'íhída bee ádee ha'diidziihii nidi dooda, nidi Diyin God doo nihá nihodiyoo'áłígíí biniyé, Aoo', didoohniiłgo t'óó, Aoo', bee hadoohdzih; Dooda, didoohniiłgo t'óó, Dooda, bee hadoohdzih. Nihitahgiísh ła'da bich'į' nahwii'ná? Bíni' éí sodilzin. Ła'daásh bił hózhǫ́? Bíni' éí Diyin God yaa haniihgo hataał. Ła'daásh nihitahgi bitah honeezgai? Bíni' éí da'oodlání áłah nádleehii yá aląąjį' naazíinii hágo bizhdidooniiłgo éí hatsii't'áagi ak'ah yadeidooziłgo Bóhólníihii bízhi' dayózhíigo há sodadidoolzįįł. Díí Diyin God dayoodlą́ągo yaa dadzólíigo sodadilzinígíí beego, hatah honeezgai doo ájít'éhí da nízhdoodleeł; Bóhólníihii nááhodidoołááł, índa ádił ni'dziilzííh ládą́ą́' há yóó'anídidoot'ááł. Áko ałch'į' bąąhági ádaaht'ínígíí ahidiníłnáago bee ádaa dahołne', áádóó doo ádanoht'éhí da nídadoohdleeł biniyé ahá sodadołzin. Diné ts'ídá t'áá ákogi át'éii bisodizin éí t'áá íiyisí bidziilgo idééłní. Iiláíjah, diné t'áá nihígi át'éé nít'éé' nidi, doo nahodoołtį́į́łgóó haleebee sodoolzin, áko táá' nááhaidóó hastą́ą́h nídeezidjį' nahasdzáán bikáa'gi t'áadoo nahóółtą́ą da. Áádóó sonáádoolzin, áko nít'éé' wót'ááhdę́ę́' nahóółtą́, áko nahasdzáán bikáa'gi nída'neest'ą́. Shik'isóó, nihitahgi ła'da hane' t'áá aaníinii bits'ánooyáago, nít'éé' éí ła'da bił nánooht'áazhgo díí baa ákodanoohsįįh, bąąhági ááníiłii ni'iisíihgo bá honít'i'dę́ę́' bił níjít'ázhígíí éí aniné bits'ą́ąjį' bii' sizíinii yisdázhdoołtééł, áko haa shį́į́ néelą́ą'jį' Diyin God bich'į' ádił ni'iisíi' nidi ałtso Diyin God há yóó'anéididoo'ááł.